بسم الله الرحمن الرحيم ، وبه نستعين ، وصلى اللهم على خير الذاكرين والشاكرين محمد صلى الله عليه وعلى أله وصحبه أجمعين..أما بعد

قبل اى كلمه هقولها بعون الله أحب أقولكم ... إنى أحبكم فى الله وأطمع من الله سبحانه وتعالى أن يحشرنا مع المتحابين فى جلاله فى ظل عرشه يوم لا ظل إلا ظله...

لحظة ضعف!!!

كتير مننا ..بفضل الله ... بقى أحسن من الاول ، وكتير مننا تاب لربنا وألتزم بسنة حبيبنا محمد صلى الله عليه وسلم ، وكتير مننا حياته أتغيرت 180درجة..

ولكن..

بتمر بينا لحظات ضعف ... بسبب وسوسه من الشيطان أو نفس أماره بالسوء ، أو حتى بسبب الغربه فى المجتمع وتأثير العالم المحيط بإيماننا وعقيدتنا.

وهنتكلم ان شاء الله عن أمثلة للحظات الضعف دى وإزاى نتغلب عليها بس طبعا صلوا على النبى أولا...

بس قبل ما نخوض فى الامثلة ، أحب أفكرك إنها ..لحظة ضعف ..ومينفعش تخلى ...

لحظة...

تخسرك عمر

(دنيا وأخرة).

ولو فكرنا كده ايه أعظم شهوه فى الارض ؟ ، يترى الجنس ولا المخدرات  ولا ولا ولا...

تخيل ان أعظم شهوة فى الارض هى شهوة الجوع...على فكرة الكلام ده مش كلامى ده كلام ناس فاهمه.

أصل لو أنت جعان مش ممكن تفكر فى أى شهوة على الارض على الاطلاق.

ولو قلنا كده فترة انتهاء شهوة الجوع واللى هى من بدايه الاكل الى الشعور بالشبع هنلاقيها بتتراوح من 3-7 دقايق يعنى عشرة دقايق بالكتير

يعنى أعظم شهوة فى الارض مدتها متزدش عن عشرة دقايق ،

فهل ينفع نضيع حياتنا بسبب متعه لا تتعدى العشر دقائق..ونضيع معاها الاخرة ، لأنك متعرفش ملك الموت هيجى أمتى ، وهيقبض روحك فى أى لحظة...

ومن أمثلة لحظات الضعف المشهورة لدى الكثير مننا :

*الشاب اللى بعد عن البنت اللى كان بيحبها أو العكس ، يجى كتير فى باله إنه مشتاق إليها ، وإنه أتسرع فى اتخاذ القرار، ويبتدى يحن للماضى.

فهقولك أثبت وكن من الرجال الذين صدقوا ما عاهدوا الله عليه ، وأفتكر انه من ترك شيئا لله عوضه الله خيرا منها ، وربنا هو الوحيد اللى يقدر يجوزك اللى تناسبك دنيا واخره كمان

..................

*ومن لحظات الضعف اللى بتمر بكتير من الشباب لحظة فوران الشهوة والقدوم لعمل العاده السريه .

هقولك أستعذ بالله من الشيطان الرجيم ، كما قال الله (وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ إِنَّهُ هُوَ السَّمِيعُ الْعَلِيمُ) فصلت36..

.وفكر نفسك إن ده من الذنوب اللى بنتهاون فيها بنظر الله إلينا ، وأفتكر كمان الناس اللى هتيجى يوم القيامه عندها حسنات مثل جبل تهامه فيجعلها الله هباء منثورا ، لأنهم كانوا إذا أختلوا بمحارم الله إنتهكوها.

وأفتكر كمان إن ملك الموت لو قبض روحك وأنت فى وضع زى كده ، هتبعث كده ، حيث من مات على شىء بعث عليه .

..........................

*ومن لحظات الضعف الرغبه فى العودة للمخدرات والشعور بالحنان إليها ، هفكرك إن ربنا من عليك وكرمك ونجاك من كده ، وفى غيرك كتير مازال فى هذا المستنقع ، فأحمد ربنا وأدعيه بالثبات ، وكل ما تراودك هذه الافكار أستعذ بالله ، وقوم أتوضأ وصلى ركعتين وقول لربنا

رَبَّنَا لاَ تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِن لَّدُنكَ رَحْمَةً إِنَّكَ أَنتَ الْوَهَّابُ

....................

*ومن لحظات الضعفة ، لحظات التفكير فى ذنوب الماضى والاحساس بلذتها والرغبه والحنين للرجوع إليها وبتبقى غالبا فى وقت الوحده أو ساعة النوم.

فمتخليش عقلك يسبح فى التفكير ، لأن التفكير مرحلة أولى

بيتبعها مرحلة الحنين والشوق الى الماضى

ثم مرحلة التساهل والتنازل

ثم مرحلة الانحدار ..

أعاذنا الله

.......................

ومن لحظات الضعف ، لحظات الشعور بالغربه فى وسط المجتمع اللى بقى الصح فيه غريب ، والشعور بالتسرع فى أخد خطوة التوبه إلى الله ونقول احنا لسه شباب....

هقولك صلى على النبى.. بدأ الاسلام غريبا ويعود غريبا فطوبى للغرباء كما قال صلى الله عليه وسلم..

ومتنساش ان من السبع اللى هيظلهم ربنا فى ظله يوم لا ظل إلا ظله شاب نشأ فى طاعة الله ،

مش نفسك تكون منهم؟

ويترى انت ضامن تعيش لبكرة؟

وأعرف ان سنة الحياة فى كل العصور ان الغلط يكون أكترمن الصح والعصاه أكتر من الطائعين...قال الله :

{(وَمَا أَكْثَرُ النَّاسِ وَلَوْ حَرَصْتَ بِمُؤْمِنِينَ }يوسف103

{((وَإِن تُطِعْ أَكْثَرَ مَن فِي الأَرْضِ يُضِلُّوكَ عَن سَبِيلِ اللّهِ إِن يَتَّبِعُونَ إِلاَّ الظَّنَّ وَإِنْ هُمْ إِلاَّ يَخْرُصُونَ }الأنعام116

وأعلم أن أذا شعرت بالوحده فأن الله يفتح لك بابا كى تأنس به

وأن من علامات الافلاس الاستئناس بالناس

فلا يغرنك كثرة العاصين وكن من القلة الفائزين

.......................

فالسالك فى طريق الله لازم يكون كيس فطن ، مدرك بكل لحظة بتمر فى عمره ، يترى دى لحظة قرب من الله أم تراجع وانحدار.

ولحظة الضعف هى تحمل فى باطنها الرحمة وفى ظاهرها العذاب ، لأنك بمجرد اجتيازك ليها بنجاح هتقوى فيك كتير،

وانت لازم هتعدى علىها وهى عباره عن امتحانات وابتلائات من الله ، علشان تثبت لربنا هل انت صادق فى ايمانك أم من الكاذبين..

قال تعالى(( الم{1} أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ{2} وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ {3))العنكبوت

يا حى يا قيوم برحمتك نستغيث فأصلح لنا شأننا كله ولا تكلنا إلى أنفسنا طرفة عين

نصائح عملية:

1.الدعاء أن يثبتنا الله على دينة وأن يحفظنا من شرور أنفسنا ومن سيئات أعمالنا

2.الانشغال بطاعة الله والاعمال الصالحه ومصاحبة الاخيار

3.قيام الليل والصيام والصدقات

4.الدعوة الى الله ، لأنك كل ما تتكلم عن ربنا هتلاقى إيمانك بيزيد

5.لو تقدر تشغل قرءان أو خطب لما تيجى تنام أو الوقت اللى انت مختلى مع نفسك فيه.

نصيحة غالية

أوعى تخلى لحظة زى كده تخليك من الاخسرين

لأن ربنا قال :

((وَمِنَ النَّاسِ مَن يَعْبُدُ اللَّهَ عَلَى حَرْفٍ فَإِنْ أَصَابَهُ خَيْرٌ اطْمَأَنَّ بِهِ وَإِنْ أَصَابَتْهُ فِتْنَةٌ

انقَلَبَ عَلَى وَجْهِهِ خَسِرَ الدُّنْيَا وَالْآخِرَةَ ذَلِكَ هُوَ الْخُسْرَانُ الْمُبِينُ)) الحج11

وصلى اللهم على خير الذاكرين والشاكرين محمد صلى الله عليه وسلم

وأخر دعوانا ان الحمد لله رب العالمين